|
Philippines, 23 Nov 2024 |
Home >> News >> Columns >> Manny Pacquiao |  |
|
||||
|
|
|
|
UMPISAHAN NA! PhilBoxing.com Thu, 02 Oct 2008  NEW YORK ? Magandang araw po ulit sa inyong lahat. Sana ay nasa mabuti kayong kalagayan. Kung ako po ang inyong tatanungin, maayos na maayos ang panimulang takbo ng aking training at kundisyon sa pangangatawan at pag-iisip at nasa tamang schedule ang lahat. Kalalapag lang namin sa New York ngayong gabi upang simulan ang pinakamalaking promotional tour ng taon sa larangan ng boxing at pupuntahan namin ang pinakamalalaking siyudad sa United States, upang maihayag sa buong America at sa buong mundo ang laban namin ni Oscar Dela Hoya sa December 6, sa Las Vegas, Nevada. Sold na daw po ang tickets para sa laban namin sa MGM Grand Arena. Siguro, habang binabasa ninyo ang kolum na ito ay nakatapos na kami sa press conference sa Statue of Liberty sa New York at siguro ay papalipad na kami papunta sa Chicago, Illinois kinabukasan upang bigyan ng apoy at init ang napipintong bakbakan namin ng tinatawag nilang Golden Boy ng boxing. Sa loob ng linggong ito, pupunta rin kami sa Houston, Texas at sa San Antonio, Texas, tapos lilipad din sa San Francisco, California at pabalik sa Los Angeles upang lalong bigyan ng excitement ang mga fans at makausap ang media. Kanina, noong nasa himpapawid kami, habang binabagtas namin ang laki at haba ng buong America, mula sa West Coast (California) hanggang dito sa East Coast (New York), hindi ko lubos maiisip kung gaano kalaki ang mundong ating ginagalawan at kung gaano tayo kaliit kung ikukumpara rito. Inabot ng limang oras ang biyahe at tatlong time zones ang haba. Habang nasa himpapawid kami kasama ang aking mga pinagkakatiwalaang mga kaibigan at miyembro ng training team, napag-isip-isip ko kung gaano kalaki itong laban na ito at kung ano talaga ang nakataya rito. Nagkaroon din ako ng panahon upang mapag-isipan ko ang aking pinagdaanan simula pa noong bata ako at kung ano na ang aking natamo. Siyempre, hindi pa rin ako nagbabago at ako pa rin iyong Manny Pacquiao na simpleng tao at madaling lapitan. Sa tingin ko, ang pagiging mapagpakumbaba palagi ang isa sa mga sikreto ng pagsikat at paglaki ng kahit sino sa atin. Iyan ay nasa puso ko at sa tingin ko, hindi ako magbabago. Bukas, o araw ng Miyerkules dito, magkakaharap ulit kami ni Ginoong Dela Hoya sa Statue of Liberty hindi bilang magkaibigan. Bukas, sisimulan namin ang paghahayag ng aming mga balak at mithi para sa laban na ito. Para sa mga taong nakakakilala sa akin, hindi ko ugaling magsalita ng masama tungkol sa aking kalaban at siyempre, naririyan pa rin ang respeto ko sa kapwa ko boxer at kalaban. Sana po ay suportahan ninyo ako sa laban na ito, panoorin ninyo ang labanang sasapit at ipagpatuloy ang pagdarasal para sa ikapapanalo nating lahat. Hanggang sa muling Kumbinasyon. God Bless Us All. Top photo: Boxers Oscar De La Hoya (L) of the U.S. and Manny Pacquiao of the Philippines pose for photographers before a news conference at Liberty Island in New York October 1, 2008. The two boxers are scheduled to fight on December 6, in Las Vegas. REUTERS/Chip East (UNITED STATES) * * * This article is also available at Abante Online. Send your comments to Manny Pacquiao at mannypacquiao@abante-tonite.com Click here for a complete listing of columns by this author. Click here for a complete listing of this author's articles from different news sources. |
|
|
PhilBoxing.com has been created to support every aspiring Filipino boxer and the Philippine boxing scene in general. Please send comments to feedback@philboxing.com |
PRIVATE POLICY | LEGAL DISCLAIMER
developed and maintained by dong secuya © 2024 philboxing.com. |
