|
Philippines, 04 Dec 2024 |
Home >> News >> Columns >> Manny Pacquiao |  |
|
||||
|
|
|
|
Magandang Simula PhilBoxing.com Thu, 19 Mar 2009  LOS ANGELES ? Magandang, magandang araw po sa inyong lahat, mga giliw kong tagasubaybay. Sana ay nasa mabuti kayong kalagayan saan man kayo naroroon sa lahat ng sulok ng mundo. Sa pagpasok ng unang linggo ng sparring para sa paghahanda sa laban kontra kay Ricky Hatton ng England, nasisiyahan ako sa naging resulta ng unang araw ng sparring kahit na medyo masakit pa rin ng kaunti ang aking mga kasu-kasuan. Apat na rounds lang ang sparring sa araw ng Martes pero naging maayos naman ang aking ikinilos, bagay na ikinasiya ng aking team. Mahirap po talaga ang buhay ng mga boxer na gaya naming at gaya ng sinapit ng aking sparring partner, talagang mapanganib ang bawat segundo na lumilipas sa ibabaw ng ring. Si Art Hovhanessyan, isang Armenian fighter na wala pang talo, ay naputukan sa mata sanhi ng isang suntok na aking pinawalan. Kahit na may head gear iyong aking sparring partner, medyo sadyang napuruhan siya sa tama ng isang kaliwa sa ikaapat na round ng sparring. Nakapagtala rin ako ng isang knockdown sa ikalawang round dala rin ng kaliwang kamay na aming inihahanda para kay Hatton, ang pambato ng Europa. Kahit na medyo inaalalayan ko ng kaunti, hindi puwedeng hinaan ang mga suntok, lalong lalo na at medyo mabilis ang ating makakalaban sa Mayo 2 sa MGM Grand Arena sa Las Vegas, Nevada. Para sa aming mga boxer, ito ay isang trabaho. Mahirap humingi ng paumanhin sa ganitong mga pagkakataon at para sa amin, madaling intindihin ang ganitong sitwasyon. Iba talaga ang panganib ng boxing. Sa isang saglit, maaaring mangyari ang kahit na anong panganib. Magaling na boksingero si Hatton kaya seryoso talaga ang aming training sa Wild Card Boxing gym kasama ang aking coach na si Freddie Roach. Kasama rin sa koponan ang baguhan ngunit matalinong si Michael Moorer, dating world champion ng heavyweight division. Kasama rin diyan sina Buboy Fernandez na matiyagang humalili sa akin dahil nasa England si Coach Freddie para sa laban ng aking kaibigan na si Amir Khan nitong huling linggo. Si Alex Ariza naman ang sumusubaybay sa strength and conditioning at masaya ang training camp dahil pare-parehong nagtutulungan silang lahat para sa tagumpay ng grupo. Malayo pa ang tatahakin namin sa paghahanda sa laban. Marami pang hirap, pagod at panganib ang aking dadaanan at sa tulong ng Panginoong Diyos, malulusutan natin iyan upang sa araw ng laban, ako ay aakyat ng ring na tanging pagpapanalo nating lahat lang ang aking iisipin. Kahit na maganda ang simula ng training, hindi pa rin ako dapat mahulog sa patibong ng pagiging over-confident. Alam ko, bukod kay Ricky Hatton, lahat ng boxer ay gusto akong talunin upang makuha nila ang titulo at korona na nakapatong sa aking ulo, ang pagiging No. 1 sa pound-for-pound list ng best fighter sa buong mundo. Gaya na rin ng aking sinabi noong huli, ?if you train hard, the fight will be easier.? Kailangan talagang maging handa palagi. Hanggang sa Muling Kumbinasyon. God Bless Us All. * * * This article is also available at Abante Online. Send your comments to Manny Pacquiao at mannypacquiao@abante-tonite.com Click here for a complete listing of columns by this author. Click here for a complete listing of this author's articles from different news sources. |
|
|
PhilBoxing.com has been created to support every aspiring Filipino boxer and the Philippine boxing scene in general. Please send comments to feedback@philboxing.com |
PRIVATE POLICY | LEGAL DISCLAIMER
developed and maintained by dong secuya © 2024 philboxing.com. |
